KALIBO, Aklan — Emosyunal nga nagpasaeamat sa Bombo Radyo Kalibo ro overseas Filipino worker (OFW) sa Saudi Arabia nga biktima it pangmaltrato ag pambastos it anang mga amo matapos nga eowas nga naka-uli sa nasyon.
Nagbisita sa Bombo Radyo si Irene Zomil-Katimpo it Barangay Rosal, Libacao, Aklan agud magpaabot it anang pagpasaeamat sa pagbulig nga makaeowas sa nasambitang sitwasyon.
Suno kay Irene nga kunta hay magserbeng leksyon ro anang mapait nga eksperyensya sa iba pang Aklanon nga nagaplanong magtrabaho sa ibang nasyon kapin eon sa Middle East, kon siin, bukon sigon it madali ro kabuhi it sangka OFW bangud nakataya kara ro andang kabuhi.
Pila sigon sa anang naeksperyensyahang kapintasan sa alima it mga amo hay ro pagtao kana it pagkaon nga ginbutangan it pahumot, pagkulong kana sa kwarto nga uwa it tubi ag pagkaon, pag-masturbate sa anang atubadngan it magueang nga ama it employer, paglingling kana samtang nagapaligos ag haeos uwa it pahuway sa trabaho.
Ginaobliga man sigon imaw nga sang beses eamang magpaligos ag mag-ilis it eambong sa sueod it sang dominggo.
Nasayuran nga nakapaeagyo si Irene pamaagi it pag-eompat halin sa ikaywang grado it baeay it anang amo.
Sa pihak nga parte, ginakabig ni Mrs. Teresita Zomil, ina it OFW nga sangka tempranong pamaskwa sa anang pamilya ro pagkaeowas sa anang onga.
