SHOWBIZ News —
Kasunod it pagbulgar sa publiko it anang pagnabdos, bakasyon grande anay ro aktres nga si Ria Atayde sa Hong Kong kaibahan ro anang asawang si Zanjoe Marudo ag mga ginikanan nga sanday Sylvia Sanchez ag Art Atayde.
Suno kana nga pagakalitan anay nana ro kahigayunan nga makabiyahe antes nga maka-unga sa anang panganay ag maging full-time mom.
Sa mga litrato nga ginpakigbahin ni Sanchez sa social media, makita nga naga-enjoy si Ria sa mga manami nga lugar sa Hong Kong, partikular sa Victoria Harbor.
Sa sangka litrato, makita nga ginabuytan ni Marudo ro baby bump ni Ria samtang ro sambilog pa hay makita nga ginapatung-an imaw it anang mga ginikanan.
“Excited for the arrival of our little Marudo. Final trip for Mommy @ria before she embarks on motherhood full-time. Yahooooooo,” caption ni Sanchez sa anang post.
Madumduman nga ginkumpirma it aktres ro anang pagnabdos ko Hunyo 16 kadungan ro pag-greet kay Zanjoe para sa anang kauna-unahan nga Father’s Day celebration.
Sa pihak kara, owa nana gin-disclose kon hin-uno imaw maga-unga.
Nagpakasae ro mag-asawa pinaagi sa civil ceremony ko nagtaliwan nga March, haeos sang buean antes nga gin-anunsyo ro andang engagement.
