KALIBO, Aklan—Gin-ako it Department of Public Works and Highways ukon DPWH Aklan nga temporaryo gidman nanda nga ginpasarado ro tulay nga nagakonekta sa Barangay Albasan ag Barangay Camanci Sur, Numancia bangud nga gabok eon raya ag delikado para sa mga nagatabok.
Suno kay Engr. Joey Ureta, maintenance head it nasambit nga ahensya, kinahang-ean nga irepair anay ro tulay antes nga buksan it uman para sa kaeowasan it mga umaeagi.
Apang, ro problema sa makaron hay uwa eon it pondo para sa construction rason nga ginhinyo nana sa budget office nga mataw-an it pondo para maayos raya nga makata-o it kasoehayan sa mga pumueoyong apektado.
Angot kara, may gintaeana nga budget nga nagaabot sa P10 milyon pesos para sa nasambit nga proyekto nga posibleng maumpisahan ro construction sa masunod nga dag-on.
Madumduman nga ginkakibot it barangay council it Albasan, Numancia ro eubusan nga pagpasarado sa tulay imbes nga kumpunihon bangud sa maabo ro nagaagi dikara adlaw-adlaw partikular ro mga estudyante.
