Magapadayun ro pagpahaum ni Alex Eala para sa French Open pinaagi sa daywang magkasunod nga torneo sa Italy, matapos ro anang produktibong kampanya sa Spain.
Matapos mag-abot sa ikaywang round it singles ag doubles sa Mutua Madrid Open ko weekend, ginpahayag it 20-anyos nga Filipina tennis star nga determinado imaw nga magbalik nga mas mabaskog.
Bago kara, makaangkon anay si Eala it sang domingo nga pahuway antes nga sumabak sa Internazionali BNL d’Italia sa Rome umpisa Mayo 5 hasta 17.
Raya hay sangka WTA 1000-level tournament, sambilog sa pinakamabahoe nga event bago ro French Open.
Kaibahan man si Eala sa listahan it mga magapasakop sa Parma Ladies Open umpisa Mayo 12 hasta 17, apang nakadepende pa ro anang pag-intra idtu sa magiging resulta it anang kampanya sa Rome.
Ro nasambit nga mga clay-court tournaments ro magasirbing ulihing pagpahaum ni Eala para sa French Open nga pagahiwaton umpisa sa Mayo 24 hasta Hunyo 7 sa Paris.
Si Eala, nga nagtapos sa Rafael Nadal Academy, hay nakahampang eon sa tatlong clay tournaments makaron nga season bilang kaparte it anang buildup. Sa pihak kara, owa pa imaw naka-eampas sa ikaywang round sa kada torneo.
