KALIBO, Aklan — Ginpaidaeum eon sa inquest proceedings para sa kasong rape angot sa child abuse law sa Aklan Prosecutors Office ro sangka 43 anyos nga eaeaki matapos nga gina-alegar nga ginhimuslan ro anang 8-dag-on nga manak sa sangka banwa sa probinsiya it Aklan .
Suno sa ina it biktima nga matapos nga maka-abot kana ro impormasyon hay insigida sanda nga nagdangop sa Women and Children Protection Desk it andang police station agud nga i-reklamo ro anang live-in partner.
Sa ginpatigayon nga operasyon hay naaresto ro suspek ag ginkulong.
Gintago eamang sa alyas nga “Baby” ro biktima nga Grade 3 pupil nga ginasugid nga tatlong beses nga nahimuslan it anang ama-amahan .
Napamatud-an sa medico legal examination nga positibong nahimuslan ro unga.
Nasayuran nga kaeabanan nga naaywan sa poder it suspek ro unga bangud nga nagapangamuhan ro anang ina ag sang beses eamang nga naga-uli sa andang baeay kada domingo.
Ginpahayag dugang nga ro magueang nga dalagita it biktima hay idtu sa anang ina naga-uli bangud sa banwa raya naga-eskwela.
Samtang, ginbawaean it kapulisan nga ma-interview it media ro ina it biktima bangud nga sensitibo sigon ro kaso ag kinahangean nga maprotektahan ro kamaeayran it unga.
