KALIBO, Aklan—Gin-insister it driver it ambulansiya nga si Rex Abello nga nagsunod eamang imaw sa mandu ni Banga Sangguniang Bayan member Johnny Rentillo.
Raya hay may kaangtanan sa pag-rescue sa limang kasimanwa nga nagatrabaho sa sangka construction firm sa Janiuay, Iloilo ag na-stranded sa ginpatuman nga enhanced community quarantine tuga it coronavirus disease ukon covid 19.
Suno kay Abello nga ginbo-oe nanda ro mga trabahador sa boundary it Passi, Iloilo ag Dumarao, Capiz ko Marso 24, Martes nga adlaw bandang alas-12 it udtro adlaw bangud nga owa eon ro mga raya it masakyan ag owa eon it makaon.
Antes nga ginsakay sa ambulansiya hay ginsiguro sigon nana nga may nagakaigo nga dokumento ro mga raya kapareho it medical certificate.
Dere-deretso suno kana ro andang biyahe, apang pag-abot sa checkpoint sa Altavas hay ginharangan sanda.
Apang matapos nga makapakita it nagakaigo nga ID ag iba pang dokumento hay ginpasugtan eon sanda nga mag-agi it mga otoridad.
Door-to-door suno kana ro andang paghatud sa mga trabahador, kun sa siin, ro daywa hay sa Brgy. Badiangan, sambilog sa Brgy. Bacan ag ro daywa nga iba pa hay sa Brgy. Cerrudo.
Gin-abisuhan man sigon sanda tanan kaibahan si Sb member Rentillo nga magpaidaeum sa home quarantine.
