Gin-engganyo it sangka American maritime security expert ro Pilipinas nga maging madahan sa mga pagtinguha nga bawasan ro tensyon sa West Philippine Sea.
Ginpahayag ni dating United States Air Force officer Ray Powell nga ro agresibong aksyon it China maeapit sa Ayungin Shoal ko Hunyo 17 hay klaru nga bukon it sangka aksidente.
Suno sa eksperto, posibleng makita it China ro de-escalation bilang sangka kahigayunan para sa andang pabor, kapareho it andang gin-obra matapos ro 2012 standoff kat sakupon kara ro Scarborough Shoal ukon kilaea bilang Panatag Shoal ag Bajo de Masinloc.
Gin-akusahan it Pilipinas nga ginbungguan sanda it China ag dayun nga sumakay sa Navy boats it mga Pilipino nga nagresulta sa bayolenteng komprontasyon kun sa siin sambilog ro naduea-an it tudlo sa rotation ag resupply mission.
Sa ginpaguwa nga footage it AFP, makita ro mga sakay nga Chinese sa maisot nga saeakyang-pandagat nga nagasinggitan, may mga buyot nga wasay, stick ag gingabutan pa ro sangka inflatable boat it mga soldad it PIlipinas.
Nauna eon nga ginhambae ni Executive Secretary Lucas Bersamin, chairman it National Maritime Council, ro magulong face-off hay posibleng sangka owa eamang pagka-ilintindihan ag sangka aksidente.
