KALIBO, Aklan—Nagapamayad eon sa makaron ro an-om ka mga indibidwal nga nagpositibo sa 2019 coronavirus disease ukon COVID-19 sa probinsya it Aklan.
Suno kay Provincial Health Officer I Dr. Cornelio Cuatchon it PHO-Aklan, estable eon ro kondisyon it mga pasyente kon sa siin lima ro naka-admit sa provincial hospital ag sambilog hay nagapabilin nga naka-quarantine sa Aklan training center.
Ginpaathag ni Dr. Cuatchon nga base sa nagguwa nga laboratory result it mga indibidwal nga nakasalamuha it mga pasyente, sa Case 3 nga taga-Kalibo hay 8 ro naging high risk kon sa siin 7 ro nag negatibo ag may sambilog pang pending.
Sa case 4 nga taga-Altavas hay 14 ro naging high risk kon sa siin 13 ro nag negatibo ag may pending pang sambilog.
Samtang sa kaso it German national hay 24 ro naging high risk kon sa siin 23 kara ro nag negatibo ag may sambilog pang pending.
Suno pa kay Dr. Cuatchon, engkaso nga matapos eon it mga pasyente ro 14 days quarantine period hay pagaboe-an sanda it uman it swab sample ag kon mag negatibo hay pwede eon ro mga raya makauli sa tagsa nanda ka panimaeay.
