KALIBO, Aklan — Apisar nga gindayaw ro ginpatigayong rehabilitasyon sa Boracay, maabo pa sigon ro dapat nga himuon sa isla.
Sa interview it Bombo radyo, ginpahayag ni Presidential Spokesman Salvador Panelo nga sambilog eon kara ro pagtapna sa iligal nga droga.
Nakaabot sigon sa kasayuran it Pangueo nga mabaskog ro baealigyaan it illegal drugs sa isla.
Importante sigon ro anti-drug campaign ni Pangueong Duterte sa nasyon kapin eon sa Boracay bangud bukon eamang it palibot ro dapat nga limpyuhan kundi bisan ro mga tawo sa lugar.
Kadungan kara, nagpanawagan imaw sa mga lokal nga opisyal, barangay officials ag kapulisan sa Boracay nga pabaskugon pa ro kampanya kontra sa iligal nga droga.
Sa pihak nga parte, gin-insister ni Panelo nga indi magiging ningas-kugon ro ginhimo it Boracay Inter-Agency Task Force nga pagsaayos it isla kapin eon ro paglimpyo sa baybayon, beachfront ag pagpaeapad sa karsada kamana man ro komunidad kon magbueoligan ro tanan ag makaangkon it political will ro mga nagadumaea kara.
Samtang, dugang pa ni Panelo nga suportado it chief executive ro total ban it casino operations sa isla bangud raya sigon ro kagustuhan it mga residente.
Apang, sa baylo nga executive order hay plano kara nga magpaguwa eon lang it verbal order.
