KALIBO, Aklan— Ginpahayag ni Atty. Plaridel Morania, sangka batikang abogado sa Aklan nga kinahang-ean maistudyuhan it husto ni Pangueong Rodrigo Duterte ro Anti-Terrorism Bill nga aprubado eon sa final reading sa Kamara antes nana pirmahan.
Raya hay kasunod sa pila ka mga pagkontra sa ginaduso nga laye kon sa siin bukon sigon it klaro nga mayad ro ginasakop it proposisyon.
Inde sigon mabasoe ro mga nagakontra sa proposed law bangud nga may nakit-an sanda nga bukon it angay ag bagay partikular nga bukon it klaro ro ginatumod nga terrorism act.
Ro Pilipinas suno kay Atty. Morania hay sangka demokrasya nga nasyon rason nga hilway ro tanan nga maipaabot ro andang mga natungdan nga reaksyon.
Una kara, sa botong 173 nga affirmative, 31 negative ag 29 nga abstention, gin-aprubahan it Kamara ro House Bill No. 6875 nga nagatuyong amiyendahan ro Human Security Act of 2007.
Sa idaeom it proposisyon, pagapenahan ro sin-o man nga magasuhestyon, magatueod, makipagsabwatan ag makipagbahin sa pagplano, training, ag pagdumaea sa sangka terrorist act; kamana man ro magata-o it suporta sa mga terorista ag recruiters it sangka terrorist organization.
Ro sin-o man nga magahimo it act of terrorism, ag ro magproponer it anumang terrorist act ag maga-engganyo it iba nga magpasakop kara hay pagapenahan it 12 anyos nga pagkakulong.
Maging ro mga magabulontaryong magapasakop sa anumang organisasyon, asosasyon ukon grupo it mga indibidwal sa sangka terrorist organization hay paga-imponeran man it 12 anyos nga pagkakulong.
Kaparehong penalidad man ro igaimponer sa mapamatud-ang accessory sa sangka terrorist act.
