KALIBO, Aklan— “Paandam sa mga tsismoso ag tsismosa”.
May multang 2,000 pesos ukon 24 oras nga community service ro paga-atubangon it mga naga-tsismis ukon nagapakalhit it saea nga istorya sa banwa it Balete.
Raya hay kasunod it ordinansa nga gin-aprubahan it Local Government Unit (LGU)-Balete.
Base sa Municipal Ordinance no. 080 series of 2018, ro pag-tsimis hay ro pagpakalhit it saea nga istorya ukon balita angot sa pribado ag personal nga bagay it ibang tawo nga owa it pahanugot.
Ginasugid nga ro “Anti-Tsimis Ordinance of Balete” hay nagatuyo nga indi makasamad ro pagtsismis sa sangka relasyon it pamilya ag sa kalinong it komunidad.
Nakabaehag pa sa ordinansa nga maabu man nga mga kaso nga gindihon sa mga barangay nga nagadugang sa hilimuon it mga opisyal.
Sa probisyon it ordinansa, ro sin-o man nga mapamatud-an nga nagapakalhit it tsimis okon saea nga balita ag impormasyon, tradisyonal man okon sa social media hay may multa nga indi magnaba sa 2,000pesos ukon 24 oras nga community service.
Kaangot kara, ginmanduan it ordinansa ro mga Punong Barangay sa 10 nga Barangay sa banwa nga maghimo it nagakaigo nga rules and regulations it nasambit nga ordinansa.
Ro mga opisyal it barangay ag mga tanod ro gintaeana nga mga ordinance officers para sa pagpatuman kara.
Aprubado eon sa pagpamati it Committee on Laws and Ordinances it Sangguniang Panlalawigan ro nasambit nga ordinansa.
