KALIBO, Aklan—Ginsuspinde it lokal nga gobyerno it Malay ro pag-require sa mga trabahanteng aklanon nga magpakita it negatibong antigen test result sa andang pagbalik sa isla it Boracay.
Raya hay base sa advisory nga ginpaguwa it LGU-Malay nga pirmado ni Malay acting mayor Floribar Bautista.
Nauna kara, gina-usuyan it antigen screening test ro mga trabahador nga magsueod sa isla ko nagtaliwan nga buean agud nga masiguro nga indi makasueod ro covid 19 sa lugar.
Suno kay mayor Bautista nga bangud nga may bakuna eon ro kaabuan sa mga trabahador hay temporaryo nanda nga ginpaiway ro antigen testing.
Raya hay naging epektibo suno kana may daywnag domingo eon ro nakataliwan matapos nga ipaidaeum ro aklan sa modified enhanced community quarantine.
Madumduman nga sa idaeum it Executive Order 031 nga ginpaguwa ko Hulyo 31, 2021, ginapasugtan ro mga trabahador nga magguwa it banwa it malay, apang kinahangean nga makabalik sanda sa sueod it 12 oras bangud nga kon indi hay obligado sanda nga magsumite it antigen test result.
Ro mga negatibong antigen tests eamang halin sa accredited clinics sa mainland Malay ro ginabaton para sa screening purposes.
Ro mga trabahador nga magapositibo sa antigen testing hay kinahangean nga magpaidaeum sa RT-PCR test.
Sa pihak nga parte, haeos 78 porsiyento eon it mga trabahador sa isla ro natigayon nga makabaton it unang dose it bakuna.
