KALIBO, Aklan — Pag-eabag sa Konstitusyon sa oras nga ibasura it mga senador ro articles of impeachment kontra kay Vice President Sara Duterte matapos mag-convene bilang sangka Senate impeachment court.
Raya ro ginpahayag ni Atty. Michael Henry Yusingco, sangka constitutionalist ag law lecturer sa interview it Bombo Radyo Kalibo.
Gintumod kara ro Konstitusyon nga nagahambae nga dapat hay bistahon eagi ro kaso sa oras nga mabaton it Senado ro articles of impeachment.
Ginpamilit kara nga kinahangean nga makaangkon it pagbista agud nga mapreserba ro integridad it Senado.
Makahueuya suno kana ro Senado kun anda raya nga baeabagan ag kanugon ro ginapasweldo kanda it publiko.
Nauna eon nga ginpahayag ni Senate President Alan Peter Cayetano nga maga-convene ro mataas nga kapueungan bilang impeachment court adlaw it Lunes, Mayo 18 ukon at the soonest possible time.
Sa oras nga mapamatud-an nga nagkasaea, posibleng mapahalin sa puwesto si Duterte ag eubusan nga ma-disqualify sa pagpadaeagan ukon pagbuyot sa anumang posisyon sa gobyerno, kaibahan ro pagpadaeagan sa eleksyon sa 2028.
