Nag-umpisa eon nga magbaton ro Commission on Election ukon Comelec it aplikasyon para sa exemption sa gun ban angot sa Barangay ag Sangguniang Kabataan Elections (BSKE).
Suno kay Atty. Roberto Salazar, provincial election officer it Comelec Aklan nga sandig sa Comelec Resolution 10918, nakabaehag nga ro aplikasyon para sa Certificate of Authority para makapagdaea it baril hay kinahang-ean nga maisumite ‘electronically’ sa Committee on the Ban on Firearms and Security Concerns (CBFSC) nga makit-an man sa website it Comelec nga nag-umpisa kahapon nga adlaw it Lunes, Hunyo 5 ag magatapos hasta it Nobyembre 15.
Kaeakip sa mga exempted sa gun ban hay ro Presidente, Bise-Presidente, Chief Justice it Supreme Court, Senate President; tanan nga senador; House of Representatives Speaker; tanan nga miyembro it House; mga huwes it Supreme Court, Court of Appeals, Sandiganbayan, Court of Tax Appeals ag maabong iba pa.
Samtang, ginataw-an man it automatic exemption ro Cabinet Secretaries, Undersecretaries, ag Assistant Secretaries, tanan nga Election Officer, Provincial Election Supervisors, ag Regional Election Directors.
