Kalibo Aklan ———–Kasado eon ro preparasyon it Aklan Police Provincial Office (APPO) sa igatukod nga mga Comelec checkpoints sa tiempo it election period agud nga mapatuman ro gun ban sa maabot nga Enero 9 it makaron nga dag-on .
Suno kay P/SSgt. Jane Vega, tagapaghambae it APPO nga tuyo kara nga masiguro ro pag angkon it malinong ag maayos nga pagpatigayon it eleksyon sa Mayo 9, 2022.
Base suno kana sa Comelec Resolution 10741, nakabaehag kara ro mga sueundanan sa pagpatigayon it checkpoints sa bilog nga nasyon para sa election period nga maga-umpisa Enero 9 hasta Hunyo 8, 2022 .
May sangka Comelec checkpoint sigon sa kada banwa nga pagabantayan it military, pulis ag taga-komisyon .
Samtang, gindugang pa ni Vega nga hasta sa visual search eamang ro gina-require sa mga checkpoint, ag bukon it obligado ro mga motorista nga buksan ro andang glove compartment, trunk ag mga bag.
Kamana man nga bawae ro magpatigayon it body search.
Nagpaandam pa imaw nga ro sin-o man ro maga-eabag sa gun ban hay paga-arestuhon it mga otoridad .
Ginlaygay man nana sa mga obrero kapareho it mga panday, matansero ag iba pa nga nagagamit it mga mataeum nga hinganiban nga aywan anay sa andang workplace ro andang mga gamit agud nga makalikaw sa kaso.
