Kalibo Aklan —-Ginaeauman nga madugangan pa ro natipon nga kapin sa P1,322,600 pesos it Aklan Police Provincial Office (APPO) halin sa boluntaryong kontribusyon it mga tawuhan kara agud nga makadugang sa pondong gintaeana it gobyerno para sa Social Amerlioration Program (SAP) ukon bulig sa mga eubus nga apektado it Enhanced Community Quarantine (ECQ) agud nga mapugngan ro mas pa nga pagkalhit it coronavirus disease (COVID-19).
Suno kay P/Staff Sgt. Jane Vega, tagapaghambae it APPO nga mag-eowas sa mga uniformed and non-uniformed members it APPO hay nagtau man it cash donations ro pilang mga retiradong pulis sa Aklan sa idaeum it Team PNP Bayanihan Fund Challenge.
Sambilog sigon ro Aklan PPO sa may pinakamabahoe nga ambag sa bilog nga nasyon rason nga tempranong nagpaabot it pagpasaeamat ro Police Regional Office (PRO-6) kay Aklan Provincial Director Police Colonel Esmeraldo P. Osia, Jr.
Ro nasambit nga kantidad sigon hay natipon eamang nanda sa sueod it tatlo hasta ap-at nga adlaw.
Ginpaathag pa ni P/Staff Sgt. Vega nga ginlunsar it National Headquarters ro Bayanihan Fund Challenge agud nga buligan ro National Government sa pagtau it ayuda sa mga pinakapigado nga pamilya nga apektado it quarantine.
Kaeabanan sigon sa mga pulis sa Aklan hay nag-ambag it P1,000 pesos hasta katunga sa andang sweldo .
