KALIBO, Aklan—Eubos ro kalipay nga nabatyagan ni Architect Virgil Fausto Patricio matapos nga maeakip ro anang pangaean sa mga nakapasar sa kakatapos eamang nga Licensure examination for Architecture.
Suno kay Architect Patricio nga owa naging madali ro aang gin-agyan eabi eon kat tyempo nga nagabuoe it board exam.
Gin-aku man kara nga mabudlay ro kurosng architecture rason nga dapat ro mga estudyante nga gustong magbuoe kara hay may bastanteng kahauman.
Naga-abot sigon it haeos daywang dag-on ro anang pag-review bangud napaiway ro anang pagbuoe it exam matapos nga magpanaeasa ro COVID-19 pandemic.
Ginpakigbahin man kara nga naka-eksperyensya imaw it kawad-an it pag-eaum sa mismong adlaw it eksaminasyon bangud masyadong malisod ro mga pangutana.
Nag-abot pa sigon sa punto nga naisipan nana nga indi eon magpadayun apang ko ulihi hay ginpursige man nana nga tapuson bangud kinahang-ean.
Ginakabig man ni Architect Patricio nga blessing ro anang pagkapasar sa board exam matapos nga owa nana matapos ro kabilugan nga 200 items it questionnaire kung siin hasta eamang it 170 ro anang natapos.
Si Patricio hay nagtapos it pagtuon sa Aklan State University (ASU) Kalibo campus ko 2018 sa kursong Bachelor of Science in Architecture.
