KALIBO, Aklan–Positibo ro naging panan-awan ni Atty. Harry Sucgang , sangka batikang abogado sa Aklan sa unang 100 diyas sa pwesto ni Pangueong Ferdinand Marcos Jr.
Suno kana nga naka-focus man ro presidente sa mga mabahoe nga problema nga ginapangatubang it nasyon.
Sa sueod sigon it 100 diyas ni Marcos, maabu eon ro natabu halin sa pagbiyahe kara sa ibang nasyon hasta sa pag-resign sa pwesto it pila sa miyembro it anang gabinite.
Apang nagapati si Atty Sucgang nga maabu pa nga kinahangean nga tutukan ro administrasyon ni Marcos eabi ro pagpabaskog sa agrikultura.
Ginsuhestiyon kara nga tiempo eon agud nga magkangay it mga foreign investors ro gobyerno nga magabulig sa pagpaumwad it agrikultura.
Raya sigon ro yabe agud nga magbaskog ro ekonomiya ag makahimo it abu nga trabaho.
Maabu suno kana nga pobre nga mga mangunguma bangud nga owa ginataw-an it prayoridad it gobyerno.
Bangud sa sangkaterbang trababo it presidente, ginpahayag ni atty sucgang nga tiempo eon nga magtaeana imaw it agriculture secretary nga naka-eubot sa pagpanguma.
Ro first 100 days it Marcos presidency hay nag-umpisa ko Hunyo 30, 2022, ko adlaw it anang pagpanumpa bilang ika-17 nga presidente it Pilipinas.
