KALIBO, AKLAN — Bangud sa eubus nga pagpalangga ag gina kabig nga matsa unga, ginbutang sa maeahaeong kabaong, ginlamayan ag gintaw-an it disenteng eubong kapareho it tawo ro sangka ayam nga gin kilaeang si Icy nga may lahing Labrador sa Nabas, Aklan.
Ro eaeaking ayam hay haeos pitong dag-un eon nga sa pagpangalaga it mag-asawang Rommel ag Chloe Casidsid matapos nga owa gin grasyahan nga magka-unga.
Sa interview it Bombo Radyo, gin pahayag it 47-anyos nga mister nga matapos nga mamatay ro anang misis ku nagtaliwan nga dag-un hay nakaangkon sigon it separation anxiety ro ayam kun siin nag umpisa rayang mag euya, owa masyadong nagakakaon ag masaming naga masakit hasta sa nakaangkon raya it viral infection.
Bago sigon binawian it kabuhi ro ayam sa Intensive Care Unit (ICU) it sangka veterinary clinic, ana rayang gin estorya it masinsinan ag gin hambaean nga engkasong nabudlayan eon hay magsunod eon lang raya sa anang gina kabig nga Mommy.
Nag eahay sigon raya it mabuhay bago nabugtuan it ginhawa.
Kat mamatay sigon ro anang ayam hay owa eagi imaw nakabatyag it kasubo apang, pagka-agahon hay dikara eon imaw nagtangis it husto kapareho it pagpanangison kat mamatay ro anang misis.
Bangud nga owa gin pasugtan nga maeubong ro ayam sa sementeryo sa iping it anang among babaye, gin pakamayad eon lang ni Casidsid nga i-eubong raya sa kilid it anang baeay pagkataliwan it haeos sang dominggo nga lamay.
Nasayuran nga napili it mag-asawa ro Labrador bangud sa natan-aw nga pelikulang “Marley and Me” nanday Jennifer Aniston ag Owen Wilson.
