Sangka 65-anyos nga babaye sa Japan ro na-scam it masobra sa 4.4 million yen it eaeaki nga nagpakuno-kuno bilang Russian cosmonaut nga nagatrabaho sa International Space Station.
Suno sa biktima nga gintago sa pangaean nga Michiko, nagpangayo kana ro scammer it 4.4 million yen nga gina-alegar nga pambayad sa space rocket nga saeakyan kara sa pagpanaog sa Earth.
Si Michiko hay residente it Shiga prefecture.
Nagkakilaea sanda it scammer sa social media app nga Instagram ko June 2022.
Makita sa instagram profile it scammer hay mga litrato it kahawaan agud nga makapangloko nga nagatrabaho imaw sa International Space Station.
Bangud nga nakaangkon eon it pag-ilintindihan sa Instagram, nag-umpisa eon sanda nga maging chatmates sa Line, sangka Japanese messaging app.
Matapos ro pilang buean, nagpahayag ro scammer nga gusto eon nana nga mag-istar sa Japan ag pakaslan si Michiko.
Apang agud nga magkita sila, nagpangayo ro fake cosmonaut it kwarta sa biktima agud nga ipangbayad bilang “landing fee” it space rocket pagtugpa sa Japan.
Nag-transfer it kwarta si Michiko nga nagabalor it 4.4 million yen sa sueod it limang installment umpisa August 19 hasta September 5.
Kat mataeupangdan it biktima nga medyu owa eon it katapusan ro pagpangayo it kwarta it anang Russian cosmonaut boyfriend, dikara pa eamang nakahalata ag nagsugod eon sa pulis.
Matapos magtau it impormasyon ag panaysayon si Michiko sa Shiga Police, nakumpirma it mga awtoridad nga sangka international romance scam ro natabu sa biktima.
Samtang gina-imbestigahan ro kaso, nagtau it padumdum ro awtoridad sa publiko nga ro pinaka-epektibong pamaagi agud nga indi ma-scam hay maglikaw sa mga bukon it personal nga kakilaea nga nakikipag-amigo sa mga social media apps and websites.
