Uwa eon nakibot ro sektor it transportasyon nga nagpanguna ro Pilipinas sa listahan it mga nasyon nga nakaeksperyensya it pinakamabahoe nga pagtaas it presyo it langis halin kat nag-eontad ro tensyon sa Iran nga gin-unahan it Estados Unidos ag Israel.
Suno kay Pagkakaisa ng mga Samahan ng Tsuper at Operator Nationwide (PISTON) president Mody Floranda, uwa pa man nag-eontad ro Middle East tension hay nakaangkon eon it overpricing sa produktong petrolyo ag mas kapin pang naglala kat nakaangkon eon it gyera bangud sa ginsamantala it mga gahaman nga oil companies ro kahigayunan maskin nga ro andang ginabaligya hay anda pang stock ag presenteng supply nga uwa pa sanda nakabakae it panibag-o.
Dugang pa ni Floranda, gin-imponer eagi it maeagkuang oil companies sa mga bumaeakae ro andang capital rason nga nagtimbook ro presyo kara sa Pilipinas.
Nasayuran nga base sa datos it Global Petrol Prices, umabot sa 81.6% ro gintaas it presyo it diesel sa nasyon makaron nga Marso nga raya ro pinakamataas sa bilog nga kalibutan.
Kasunod kara ro Nigeria nga may 78.3% ag Malaysia nga may 57.9% nga pagtaas.
Ginpakita sa datos nga mas grabe ro epekto it pangkalibutanong krisis sa merkado it langis sa mga nasyong Asyano kapin eon sa Pilipinas nga eubus nga nagasalig sa imported nga suplay raya ro nagtao it kahigayunan sa mga gahaman nga oil companies nga magpinagusto sa pagpataas it presyo.
