BALITANG Espesyal — Sangka bag maker company nga nakabase sa Tokyo ro nag-obra it randoseru ukon backpack nga para eamang sa mga alagang ayam!
Ro randoseru hay sangka klase it backpack nga ginagamit it mga elementary students sa Japan.
Ro randoseru hay himo sa matibay nga materyal kapareho it leather ag gin-desinyo agud nga magbuhay it an-um nga dag-on it pagtuon sa elementarya.
Raya hay kaeabanan nga may mga makolor nga disenyo ag tradisyon eon raya nga iregalo sa mga an-um nga dag-on nga unga antes sanda nga mag-umpisa nga magsueod sa Grade 1.
Ro nasambit nga tradisyon hay naghalin pa ko Edo period ag hasta sa makaron hay simbolo gihapon it pag-umpisa it pagtuon it mga unga sa Japan.
Bangud nga kaeabanan raya nga makita sa mga anime ag Japanese dramas, naging fashion item eon man raya sa western culture.
Bangud nga nauso eon man raya sa mga adult western foreigners, naisipan it bag maker company nga Tsuchiya Kaban nga mag-obra man kara para sa mga ayam.
Ginpaguwa nanda ro nasambit nga produkto ko Oktubre 2023 ag nag-viral raya matapos i-post it sikat nga baseball player nga si Shohei Ohtani ro anang alagang ayam nga may suksok kara.
Sa pihak nga mahae ro randoseru nga nagabalor it 49,500 yen ukon katumbas it P17,980, maabu ro nagbakae kara ag na-sold out eagi ko nagtaliwan nga dag-on.
Suno sa Tsuchiya Kaban, maga-release eon man sanda kara makaron nga Hulyo.
