KALIBO, Aklan—Maskin nga may mga nagabisita eon sa puntod it andang mga mahae sa kabuhi masobra sa sang domingo antes ro pista minatay, mahina sa gihapon ro baealigyaan it bueak sa mga flower shops sa parte it Roxas Avenue, Kalibo.
Suno kay Evelyn Vasquez, sambilog sa may stall nasambit nga lugar nga posibleng sa masunod nga domingo pa magabuhos ro mga bumaeakae.
Kaeabanan sigon nga mahina pa ro mga customers sa makaron nga paniempo.
Mag-eowas kara, sangkiri pa eamang ro ginabagsak ukon naga-abot nga supply it mga bueak halin sa Baguio ag Cebu.
Ginpahayag dugang nga maskin nga normal nga nagamahae ro presyo it bueak kada nagahilapit ro pista minatay, apang indi pa sanda makatau it ensaktong presyo.
Posible suno kana nga 30 hasta 40% ro igasaka sa presyo kun sa siin owa man ginaeauman nga magaka-ubusan it supply makaron nga selebrasyon sa tunga it pandemya.
Samtang, masyado suno kana nga maeayo ro daeagan it andang negosyo makaron kumpara dati nga owa pa it pandemic.
Nagaeaum man sanda nga makabawi makaron nga dag-on matapos ro paghaeuga sa mga restrictions.
Ro presenteng presyo it andang baligya nga bueak, sa mini arrangement, raya hay nagabalor it P100 pesos; ro naka-basket hay naga-umpisa sa P300 pesos pataas depende sa kaabuon ag klase it bueak.
Mas mayad suno kana nga mag-pre-order eon makaron agud nga malikawan nga makipagdueutdutan.
