Padayon ro imbestigasyon it Bureau of Fire Protection (BFP)-Libacao matapos masunog ro sangka panimaeay sa Brgy. Alfonso XII, Libacao, pasado alas-11:00 it gabi-i ku adlaw it Martes Agosto 4.
Suno kay F01 Ernest Denol-Tolentino, Acting Chief Intelligence and Investigation Officer it nasambit nga taeatapan, pag-abot it andang rescue team sa lugar, totally burned eon ro baeay nga kaeabanan hay himo sa light materials nga ginapanag-iyahan ni Virgilio Zonio.
Base sa inisyal nga imbestigasyon, naghalin ro kaeayo sa sueod it panimaeay.
Apang padayon pa ro imbestigasyon it BFP agud matumod ro insaktong ginhalinan it sunog.
Suno kay F01 Tolentino, may daywa ka indibidwal ru nabilin sa baeay, eakip ro sangka 8-anyos nga unga ag sangka tatlong dag-on nga unga.
Ro sambilog sa mga biktima hay nakaagum it first-degree burn sa waea nga parte it ibabaw nga eawas ag likod, nga insigida man nga gindaea sa ospital para sa nagakaigo nga pagbueong.
Padayon nga ginatipon it BFP ro dugang nga ebidensya ag testimonya agud makompleto ro andang imbestigasyon ag masayran ro minatuod nga rason it sunog.
Samtang, ginapadumdom it ahensya sa publiko nga magdahan sa paggamit it mga kagamitan nga puwedeng umpisahan it kaeayo agud malikawan ro kapareho nga insidente.
