Umabot eon sa Pilipinas ro bag-ong guided missile corvette-class warship halin South Korea nga may advanced weapons ag radar systems.
Ro 3,200 toneladang warship, nga paga-tawgon nga BRP Miguel Malvar, hay sambato sa daywang corvette-class warships nga parte it kasugtanan it Pilipinas ag South Korea ku 2021.
Hango ro pangaean sa unang corvette sa rebolusyonaryong heneral it Pilipinas ag bayani nga si Miguel Malvar. Ro sister ship kara nga BRP Diego Silang hay pormal nga gin-lunsar sa Ulsan, South Korea ku nagtaliwan nga buean apang, nakataeana pa eamang rayang ipadaea sa Pilipinas.
Ginpangunahan man ni Defense Secretary Gilberto Teodoro ro arrival ceremony it warship sa Naval Operating Base sa Subic, Zambales. Dikara, ginbaton it Philippine Navy ro bag-ong barkong pandigma.
Sa anang pahayag, hinambae it opisyal nga ro pag-abot it BRP Miguel Malvar sa nasyon hay bukon eamang para magserbeng deterrent ag taga-depensa it atong mga katubian kundi bilang sangka mahaegang parte sa joint ag combined operations kaibahan ro mga kaalyadong nasyon.
Madumduman nga unang gin-anunsyo ro kasugtanan para sa daywang bag-ong warships ku 2021, limang dag-on matapos magdaog it kontrata ro Hyundai Heavy Industries para sa pag-ubra it daywang bag-ong frigate para sa Philippine Navy.
Ro Corvettes hay maisot ag madasig nga barkong pandigma nga nagapangunang ginagamit sa pagprotekta sa ibang mga barko halin sa mga pag-atake. Ro pag-abot man it bag-ong barkong pandigma it Pilipinas hay sa tunga it padayon nga komprontasyon sa tunga it mga barko it Pilipinas ag China sa West Philippine Sea.
