NATIONAL News — Nakataeana nga magpaguwa ro gobyerno it Pilipinas it bag-o nga mapa nga may West Philippine Sea (WPS) matapos eubusan eon nga naging laye ro Maritime Zones Act ag Philippine Archipelagic Sea Lanes Act.
Suno kay National Mapping and Resource Information Authority (NAMRIA) Administrator Usec. Peter Tiangco, sueod it bag-o nga mapa ro tanan nga mga lugar nga sakop it soberanya ag sovereign rights it Pilipinas eakip ro West Philippine Sea sandig sa deklarasyon it Permanent Court of Arbitration ko 2016.
Kaibahan man kara ro Benham Rise ukon Philippine Rise nga plano nga tawgon bilang ‘Talampas ng Pilipinas’, ag iba pa nga mga teritoryo ag isla nga sakop it sovereign rights it nasyon.
Suno kay Tiangco, mas mabakod ro bag-o nga mapa kumpara sa 9-dash line map it China bangud nga base ag suportado raya it naga-eksister nga laye.
Pahayag it opisyal, ginahueat eon lang nanda nga magguwa ro implementing rules and regulation para sa ginpirmahan nga Philippine Maritime Zones Act antes igapaguwa ro bag-o nga mapa it Pilipinas.
Dugang pa ni Tiangco, dag-on 2012 pa kat ulihi nga magpaguwa it opisyal nga mapa ro nasyon rason nga maabu eon nga bag-o nga features sa bag-o nga mapa.
