KALIBO, Aklan – Ginpaandam it grupong Philippine Chamber of Telecommunication Operators (PCTO) ro posibilidad it bag’ong bugso it mga messaging scam sa nasyon.
Ro bag’ong messaging scam ngara, suno sa grupo hay kayang magsueod o magpadaea sa mga users nga uwa naga’agi sa filtering system.
Sa ginpaguwa nga statement it grupo, gin’engganyo kara ro mga industry players ag ro gobyerno nga magbueoligan agud mapunggan ro panibag’ong bugso it text scam, eabi eun ag nahihimo eun sigon it mga cybercriminal nga sudlon ro mga barrier o filter nga ginbutang it mga telco para punggan ro pagsueod it text scam.
Ginakabaeak-ean man it grupo ro sigon hay padayon nga pagpadaea it mga scammer it mga mensahe nga medyo matuod ag kapati-pati sa mga users nga nakakabaton kara.
Pila sa mga ginhalimbawa it grupo nga ginagamit kara it mga scammers hay ro foreign SIM card, fake cell towers, ag mga imported nga spoofing device.
Paagi sa mga raya nahihimo it mga scammers nga magpadaea it mensahe sa andang mga target, mang-akit, ag mang-scam.
