KALIBO, AKLAN — Ro gin eaum nga migraine it sangka 39-anyos nga eaeaki nga nagiging rason it grabeng paeanakit it anang ueo hay epekto it pagpabilin it sangka bala it kalibre 22 nga baril sa anang bungi sa sueod it napueong dag-un.
Gin kilaea ro pasyenteng si Ireneo Iledan, sangka laborer, residente it Brgy. Magubahay, Ibajay, apang, temporaryong naga estar sa Purok 1, C. Laserna St. Kalibo, Aklan.
Nasayuran nga ku 2007 hay naghanang magpakamatay ro eaeaki pinaagi it pagbaril sa anang tuong sentido.
Gin padangat sigon imaw sa sangka ospital sa siyudad it Iloilo bangud sa kritikal nga kundisyon ag nakaeowas sa kamatayun.
Gin pahayag ni Mary Ann Iledan, igmanghod it pasyente nga owa eon nagbalik ro anang magueang sa doktor para sa follow-up check-up matapos nga naka-eubong pa sa anang bungo ro bala.
Gin kakibot man it mga doktor sa Aklan Provincial Hospital ro hitabo matapos makita sa x-ray ag CT scan examination result nga may bala raya sa ueo nga sa makaron hay nag iswag maeapit sa anang dahi.
Nasayuran nga owa eagi gin hambae it pasyente ro anang medical history dahilan nga nangawa ro mga doktor sa andang nakita.
