KALIBO, Aklan—Nakataeana nga magapueong ro Banga Inter-Agency Task Force on COVID-19 agud nga matalakay kung ano nga penalidad ro igapasaka kontra kay Sangguniang Bayan member Johnny Rentillo ag sa driver it ambulansiya nga si Rex Abello.
Raya hay sa oras nga makapasa eon sanda it andang natungdan nga written explanations.
Ginpahayag ni Ma. Donnalyn Siyambio PIO it nasambit nga Task Force nga ro limang construction worker kaibahan sanday SB Rentillo ag driver nga si Abello hay owa nagapakita it sintomas kapareho it eagnat, ubo, diarrhea ag iba pang respiratory symptoms.
Apang maskin nga owa sanda naeakip bilang mga persons under monitoring ukon PUM hay obligado ro mga trabahador nga residente it Brgy. Cerrudo, Bacan ag Badiangan nga magpaidaeum sa 14 diyas nga home quarantine nga nag-umpisa ko Marso 24 hasta Abril 7.
Hugot sigon sanda nga ginabantayan makaron it andang natungdan nga Barangay Health Emergency Response Team.
Ginklaru pa ni Siyambio nga engkaso nga nagagamit it municipal ambulance hay dapat nga may nagakaigo raya nga travel order.
Nasayuran nga gin-uean it kritisismo it mga netizens si Rentillo bangud sa pag-rescue sa limang trabahador pasueod sa Aklan halin sa probinsiya it Iloilo matapos nga maigpit sa ginpatuman nga enhanced community quarantine.
Ginsueang ro mga raya sa boundary it Passi, Iloilo ag Dumarao, Capiz gamit ro ambulansiya ko Marso 24.
Sa makaron hay nagapabilin nga covid free ro aklan samtang ro Iloilo hay may 2 kaso, tig sambilog sa Capiz ag Bacolod City.
Nag apela man si Siyambio nga likawan nga i-discriminate ro mga ginakabig nga PUIs ag PUMs kamana man ro mga fronliners.
Pila sigon sa mga raya hay nakaangkon it kaeain it buot bangud sa naexperiensiyahan nga diskriminasyon halin mismo sa andang mga kasimaryo.
