KALIBO, Aklan—Patay ro sangka mag-asawa matapos nga sinunggaban it ceres bus ro andang ginasakyan nga tricycle sa national highway nga sakop it Brgy. Union, Nabas.
Ginkilaea ni P/Cpl. Andrew Andrade it Nabas Police Station ro mag-asawa nga sanday Cezar Sadiasa, 54-anyos ag Celia Sadiasa, 58-anyos ag parehong residente it Sitio Tagrorok sa nasambitang banwa.
Samtang, ro driver it ceres bus hay ginkilaeang si Jonito Gumboc, 46-anyos ag residente it Brgy. Napaan, Malay.
Base sa inisyal nga imbestigasyon it pulisya, halin sa Brgy. Caticlan, Malay ro mag-asawa sakay it andang tricycle nga ginamaneho mismo ni Cezar kon sa siin nagpamakae sigon sanda it mga tiles ag grocery para sa andang minimart apang pag-abot sa nasambitang lugar hay gulpi eon lang sanda nga ginsunggaban it kasub-eang nga ceres bus nga may sakay nga 18 ka mga pasahero nga paadto sa Brgy. Caticlan.
Bangud sa mabaskog nga impact it pagkasunggab, inapok si Celia samtang naigpit mat-a si Cezar.
Kaangot kara, gilayon nga gindaea sa Malay Municipal Hospital si Cezar apang ginbawian man eagi it hueam nga kinabuhi samtang ginarevive it nag-atendir nga doktor.
Samtang, si Celia samtang ginabyahe paadto it sangka pribadong ospital sa banwa it Kalibo hay ginhapit anay raya sa Ibajay District Hospital para eapatan it dugang nga medikasyon apang gindeklara man nga patay it attending physician.
Sa makaron ro ceres bus driver hay una sa paghinakop it Nabas PNP ag posibleng magapangatubang sa kasong reckless imprudence resulting to multiple homicide ag damage to property.
