KALIBO, Aklan — Nasapwan ro bangkay ko empleyado it sangka kompaniya sa Barangay Union, Nabas, Aklan.
Nagapaeotaw-eotaw sa eawod ro bangkay ni Edmar Bentoso, 22, nagatrabaho sa DATEM Inc., ag residente it Sitio San Juan, Barangay San Roque, Libertad, Antique kat makit-an raya it residenteng si Romeo Baricautro.
Gilayon raya nga nagpangayo it bulig sa guwardiya it Caticlan airport nga maeapit sa lugar ag pagkatapos hay nagreport sa taeatapan it pulisya.
Suno kay PO2 Melvin Alba it Nabas Police Station, may mga lastro sa ueo ag eawas ro bangkay it biktima.
May nakit-an man nga agi it dugo sa baeas.
Narekober sa boesa ko saewae it biktima ro anang cellphone ag kahita nga may ID, kwarta ag payslip.
Sa makaron ro insidente hay padayon pa nga ginaimbestigahan it Nabas PNP.
