POLICE Report — Kulong ro sangka pulis matapos nga barilon ag mapatay it nakagitgitan nga motorista samtang sambilog pa ro naninahan sa Quezon City.
Ro suspek hay sangka Police Executive Master Sergeant ag naka-assign sa Batasan Police Station 6.
Sa imbestigasyon, natabu ro pagpamaril sa kahabaon it Tandang Sora Avenue sa Brgy. Old Balara bandang alas-6:30 it gabi-i.
Gina-alegar nga ginamaneho it 48-anyos nga pulis ro anang saeakyan kat makagitgitan sa trapiko ro driver it sangka L300 van.
Ginbaeabagan it pulis ro van ag nagpanaog sa anang saeakyan ag pagkatapos hay ginkompronta ro driver kara.
Sa kaakig, ginbayo it pulis ro 42-anyos nga driver it van nga si alias Borromeo ag pagkatapos hay binaril raya it makapilang beses gamit ro anang service firearm.
Pagkatapos hay bumalik sa saeakyan ro pulis ag nagpanaw nga matsa owa it natabu samtang gindaea mat’a si Borromeo ag ro anang kaibahan nga si alyas Reynaldo para mabueong.
Sa owa it swerte, si Borromeo hay gindeklarang dead on arrival samtang nagapamayad pa si Reynaldo nga nag-angkon it igo it bala sa waea nga balikawang ag hita.
Insigida man nga nagsurender ro pulis sa nagadumaea it sangka outpost sa Commonwealth Avenue ag ko ulihi hay gindaea imaw sa Batasan Police Station 6 para sa imbestigasyon.
Nabo-oe sa crime scene ro pitong basiwo it bala.
Sa sangka pahayag, nagpromisa ro Quezon City Police District nga maid-id nga paga-imbestigahan ro insidente para mataw-an it hustisya ro mga biktima.
Nakakulong eon ro pulis nga nagapangatubang sa kasong homicide ag frustrated homicide.
