KALIBO, Aklan—Masobra sa P11-bilyon ro ginkalugi it probinsiya it Aklan sa industriya it turismo umpisa kat ginpatuman ro enhanced community quarantine hasta nga ginpanaog raya sa general community quarantine bangud sa coronavirus disease ukon COVID-19.
Base sa pagtantiya it Department of Tourism (DoT) Region 6, kapin sa P11.33-bilyon nga tourism receipts ro naduea sa probinsiya bangud sa lockdown sa isla it Boracay umpisa ko Marso hasta makaron nga buean it Mayo.
Ginaeauman nga magakita kunta ro Boracay it ginatantiya nga P6.94 billion halin sa mga dumueuong nga turista ag P4.39 billion halin sa local tourists sa nagtaliwan nga daywang buean.
Raya hay base sa tourist arrivals sa Boracay sa kaparehong period ko 2019.
Mabahoe sigon ro naging epekto sa pagkansela it biyahe it mga turista eabi eon sa katung-anan it Chinese New Year.
Ginaeauman it probinsiya nga posible pang magapadayun ro negatibong epekto sa turismo it COVID-19 pandemic hasta sa masunod nga mga binuean.
Kapin sa 2.2 milyon ro tourist arrival sa Boracay ko nagtaliwan nga dag-on nga kumita it haeos P62.5 bilyon sa tourism receipts.
