KALIBO, Aklan — Gin-aprubahan it Sangguniang Bayan it Kalibo ro sangka resolusyon nga nagahinyu kay Mayor Juric Sucro angot sa pagbakae it mga tow truck nga igapaidaeum sa pagdumaea it Municipal Disaster Risk Reduction and Management Office (MDRRMO).
Ro resolusyon hay gin-author ni SB Member Ronald Marte.
Suno kana nga ro pondo hay pagaboe-on sa taeatapan it MDRRMO para sa pag-purchase it sambilog anay sa daywa nga ginaplano nga bak-eon nga brand new nga tow truck.
Ginpahayag dugang nga ro nasambit nga plano hay kasunod it mga obserbasyon nga may pilang mga saeakyan nga nagapatigayon it illegal parking kun sa siin pila sa mga raya hay mga samad eon nga ginapabay-an nga naka-tengga sa kilid it karsada.
Mag-eowas kara, nagatuga man sigon it paggutok it trapiko ro mga saeakyan nga naeakot sa mga aksidente ukon nasamaran sa tunga it karsada nga indi eagi mabo-oe bangud sa kakueangan it kagamitan it banwa.
Makabig sigon ro mga makarondaya nga insidente nga sakop sa programa it MDRRMO nga “public safety” ag “disaster preparadeness.”
Sa regular nga sesyon it konseho, gindayaw ni Punong Barangay ag SB Kalibo Ex-Officio Member Neil Candelario ro nasambit nga tikang nga mabahoe nga bulig sa mga ginapatigayon nga clearing operations.
Magataeana sigon kara it towing fees sa mga saeakyan nga pagadaehon sa motorpool sa Brgy. Nalook, Kalibo agud nga mas pa nga mapabaskog ro implementasyon it illegal parking ordinance kamana man nga maging mas responsable ro nga nagapanag-iya it mga saeakyan nga masiguro nga ro mga raya hay roadworthy.
