Kalibo Aklan ———-Umpisa sa adlaw it miyerkules, Hunyo 9, hugut nga pagabantayan ro tatlong major border control points it banwa it Kalibo sa sueod it daywang domingo.
Raya hay kasunod it mas ginhugtan nga implementasyon it health protocol kasunod it maka-alarma eon man nga pagtinaas it kaso it COVID-19 sa bilog nga probinsiya it Aklan .
Suno kay Kalibo Mayor Emerson Lachica nga kapareho man it dati, ro mga border control points hay makit-an sa bukana it Kalibo-Numancia bridge, Barangay Tigayon Kalibo ag Barangay Caano.
Ginabantayan sigon raya it mga katapo it Kalibo Municipal Police Stations ag mga opisyal it Barangay.
Tuyo sigon kara nga malimitahan ro hueag it mga tawo kun sa siin ro mga essential workers eamang ro ginapasugtan nga makasueod.
Ro mga nagatrabaho sigon sa Kalibo hay dapat nga magpakita it company ID ukon certification halin sa employer.
Ginpadumdum man ni Mayor Lachica nga bawae gihapon nga mag-inuman sa guwa it panimaeay.
Nag apela man si Mayor Lachica sa publiko nga magsunod anay sa mga ginapatuman nga guidelines ag health protocols agud nga masiguro ro kaeowasan kontra sa makamaeatay nga sakit .
Partikular ro pagsuksok it face mask , face shield ag physical distancing.
Importante man suno kana makaron nga tiempo nga magbuylog ag magbueuligan agud nga matapos eon ro sitwasyong ginapangatubang it nasyon.
Sa pihak nga parte, maskin nga maabu eon nga mga empleyado it Munisipyo it Kalibo ro nagpositibo sa COVID-19, owa nagpasugot si Mayor Lachica sa ginaduso it pilang mga empleyado nga work from home arrangement .
Raya suno kana hay base man sa rekomendasyon kana it mga head of offices .
Mas mayad suno kana nga ro mga empleyado hay magpabilin sa andang mga opisina kaysa sa work from home.
