KALIBO, Aklan—Ginpaidaeom eon sa general community quarantine ro bilog nga banwa it Malay kaeakip ro isla it Boracay.
Suno kay Madel Tayco, deputy information manager it Malay inter-agency task force against COVID-19 nga raya hay sandig sa ginpirmahan ni Malay Acting Mayor Frolibar S. Bautista nga Executive Order No. 014, series of 2020 nga naga-deklara sa banwa it Malay sa idaeom it General Community Quarantine halin hin-aga nga adlaw it Huwebes, Marso 19 nga maga-umpisa badang alas-10 it gabi-e.
Ginpaathag ni Tayco nga ro mandato hay magapabilin nga igapatuman hasta sa ipapundo raya it alkalde.
May kaangtanan kara, magiging limitado ro pagguwa it mga pumueoyo mag-eowas eon lang kon magabakae ro mga raya it pagkaon, bueong ag iba pang kinahang-eanon sa sueod it baeay.
Ginpahayag dugang nga ro mga turista, lokal man ukon dumueoong maskin siin mang lugar halin hay inde eon makasueod sa banwa ag sa Boracay mag-eowas eon lang kon may ipakita ro mga raya nga proof of residency ukon valid identification card nga sanda hay nagatrabaho sa isla.
Ro Curfew hay igapatuman halin alas-10:00 it gabi-e hasta it alas-5:00 it aga-aga kon sa siin makit-an ro presensya it mga kapulisan, soldado ag iba pang law enforcers sa mga boundaries nga sakop it banwa ag nasambitang isla.
Samtang, ro byahe it mga motorbanca patabok sa isla vice versa hay halin it alas-6:00 it agahon hasta alas-9:00 it gabie.
Katuyuan it pagpaidaeom sa general community quarantine ro bilog nga banwa hay agud nga mapabiling eowas sa COVID-19 ro lugar.
