KALIBO, Aklan—Ginbatikos it grupong Bantay Bigas ro anunsyo it gobyerno nga maganaba eon sa 42 hasta 45 pesos ro presyo it kada kilo it bugas nga mabakae sa mga merkado.
Raya hay kasunod it pagnaba it taripa halin sa 35% sa 15% kon sa siin mismong ro Department of Agriculture kaibahan sanday House Speaker Martin Romualdez, ACT-CIS Party-list Representative Erwin Tulfo, Department of Trade and Industry ag Philippine Rice Industry Stakeholders Movement ro nagpasiguro nga may mabakae eon nga baratong bugas sa mga pampublikong merkado.
Suno sa tagapaghambae it grupo nga si Cathy Estavillo, imaw mismo ro nakasaksi nga uwa it kaparehas kara nga presyo nga mabakae sa mga baligyaan bangud nga ro ginapaasenso eamang it gobyerno sa pagpanaba it taripa hay ro mga traders ag importers.
Kanda eamang paborable ro ginhimo nga tikang it gobyerno ag uwa nakabulig sa mga kubos bangud nga nagapabilin nga mahae ro presyo it bugas ag barato eamang ro pagpamakae it mga raya sa produkto it lokal nga mangunguma.
Madumduman nga sa report it Philippine Statistics Authority (PSA) angot sa andang August Inflation Report, mabahoe nga parte kara ro bugas.
Apang, suno sa grupong Samahang Industriya ng Agrikultura ukon SINAG, ro pagbawas sa rice inflation hay bukon it buot hambaeon nga maganaba ro presyo it bugas.
Kapin sa 14.7 percent eamang ro inflation sa bugas ko Agosto.
Mas manaba raya kumpara sa 20.9 percent ko buean it Hulyo.
