NUMANCIA, Aklan—Nakarekober it baril, mga bala ag granada sa sangka subject person sa bahin it Purok 2, Brgy. Navitas, Numancia sa ginpatigayon nga buybust operation.
Ginkilaea ro eaeaki nga si Freddy Tafalla y Capispisan ukon alyas Nonong nga residente man it nasambit nga lugar.
Ginpangunahan ro nasambit nga inisyatibo it Provincial Drug Enforcement Unit ag Numancia Municipal Police Station.
Pahayag ni Police Major Frenzy Andrade nga pirmado ni Honorable Judge Montalid Patnubay ro search warrant nga ginserbi sa eaeaki.
Paathag ni Andrade nga naangot ro eaeaki sa pagpamaril samtang raya hay una mismo sa anang trysikol sakay ro anang asawa sa bahin it Brgy.Venturanza, Banga, Aklan apang apisar nga raya hay nakarecord sa Banga Municipal Police Station hay nag-execute ro asawa it biktima it affidavit of non-interest.
Pagklaro nana nga uwa nanda harekober ro 45 nga baril nga raya gingamit sa nasambit nga krimen apang duda sanda nga ginatago raya it suspek.
Dugang ni Andrade nga inabot man it dinag-on ro andang pagmonitor kay Tafalla.
Nagapati man ro mga kapulisan nga angot raya sa serye it mga pagpamaril sa probinsiya ukon mga gun for hire.
Hugot man ro pamalibad it eaeaki nga bukon it ana ro mga butang nga narekober kana.
Sa makaron, igapaidaeom anay sigon ro mga raya sa ballistic examination.
Samtang, may pipila man nga mga suspek it pagpamaril ro hadakpan ag naangot kay Tafalla ukon ro iba hay anang mga hugot nga abyan ag imaw ro ginaturo nga driver ku mga raya.
Panindugan man ni Andrade nga uwa sanda naila nga may mga patayan nga nagakatabo sa probinsiya ngani hugot ro andang imbestigasyon nga ginapatuman parte sa mga serye it pagpamaril ukon mga motor riding suspects.
Dugang ni Andrade nga naga-imbestiga man sigon sanda kun angot sa droga si Tafalla.
