KALIBO, Aklan—Kadungan sa State of the Nation Address ni Pangueong Ferdinand Marcos Jr. sa adlaw it Lunes Hulyo 22, magapatigayon man it State of the People Address ro mga progresibong grupo nga pagapangunan it Bagong Alyansang Makabayan agud nga ipanawagan ro promisang pagbag-o ag pag-umwad it administrasyong Marcos sa sueod it daywang dag-on kara nga pagpanerbisyo nga suno kanda hay uwa it naging mihura.
Suno kay Kim Sin Tugna, provincial coordinator it Bagong Alyansang Makabayan, padayon nandang ginapanawagan nga ibasura ro Rice Tarrification Law nga nagpakalisod it husto sa mga pumueoyong Pilipino eabi eon sa mga kubos nga mangunguma bangud nga ro mas ginpaboran it raya nga laye hay ro mga gahaman nga rice traders kasunod it pagbaha it rice importation.
Mag-eowas kara, tyempo eon man agud nga sukton ro gobyernong Marcos sa ginpromisa nga improvement sigon it nasyon kon imaw ro mailihir bilang presidente apang hasta sa makaron hay uwa raya nakit-an ag nabatyagan it mga pumueoyo bangud sa mataas nga baeak-eon, presyo it langis, reporma sa tanan nga sektor ag ro ginpromisang P20 pesos nga kada kilo it bugas nga ro tumugpa hay P50 hasta P60 pesos kada kilo nga inde masarangan bak-eon it kubos nga pumueoyo.
