Pahayag ni Kim Sin Tugan ro spokesperson ku Bagong Alyansang Makabayan ukon Bayan Aklan sa pakikipag-angot it Bombo Radyo Kalibo nga makaron Disyembre 10 hay ro selebrasyon it International Human Rights Day.
Importante sigon raya bangud nga nagatuyo raya sa pagsukoe para sa tawhanon nga kinamatarong eabi eun nga halin pa dati hasta makaron nga maabo ro nagapangatubang it human rights ag socio-economic violation.
Maabo man ro nagapangatubang it violation eabi eun sa mga aktibista kung siin nga may mga pamisaea man nga ginabuhian parte kanda nga uwa it kamatuoran.
Samtang, sa pihak nga parte ro mga manguguma nga sanda sigon ro nagatao it pagkaon pero sanda pa sigon ro nagugutuman kung siin nga uwa pa gid it solusyon sa sistema it agrikultura ngani nga bisan ro andang grupo hay padayon ro ginahimo nga protesta ag pagsukoe sa nasambit nga isyu.
Bilang parte it nasambit nga selebrasyon, alas-12 it tru-adlaw, Disyembre 10 hay magapatigayon it “Ilabas it Pobre” nga ro mga manguguma nga magapartisipar hay magahalin sa mga nagkaeain-eain nga banwa ag tuyo kara nga ipakita ro realidad it kahimtangan ku mga mangunguma kesa sa ginapromisa ku gobyerno.
Dugang pa nga may martsa nga ginhimo halin sa Mabini Street hasta sa Pastrana Park para ipabutyag ro andang mga handum ag demands parte sa human rights violation ag maabong iba pa.
Mensahe pa ni Tugna nga suportado ku andang organisasyon ro peacetalk nga uman nga ginbuksan sa tunga it gobyerno ag National Democratic Front of the Philippines (NDFP).
