KALIBO, Aklan–Suportado it Bagong Alyansang Makabayan ukon Bayan-Aklan ro igapatigayun nga sang dominggong transport stike it pilang ka mga driver ag operator agud nga ipaabot ro andang sentimiyento ag pagpamaeabag sa ginaduso it gobyerno nga Public Utility Vehicle (PUV) Modernization Program.
Suno kay Kim Sin Tugna, Provincial Coordinator it Bayan-Aklan nga maabu pang kinahang-ean tun-an antes eubusan nga ipatuman ro pag-modernize sa mga pampublikong saeakyan.
Hugut sigon nga naga-oponer ro andang grupo sa planong pag-phase out sa mga traditional jeepney nga nagabiyahe sa bilog nga nasyon.
Mabahoe sigon ro posibilidad nga maeubog eamang sa utang ro mga ordinaryong driver ag operator engkaso nga madayun ro modernization program.
Imbes nga makabulig hay magatuga eamang raya it dobleng kalisod ag paeas-anon.
Nasayuran nga ro sangka unit it modernize jeepney hay naga-balor it P2.4 million hasta P3 million.
Kun sa siin, raya hay andang pagabayaran sa sueod it pitong dag-on.
Nauna eon nga gintaw-an it Land Transportation Franchising and Regulatory Board (LTFRB) it deadline nga hasta Disyembre 31 ro mga driver ag operator para magpasakop sa sangka kooperatiba ukon korporasyon.
