KALIBO, Aklan—Suportado it Bagong Alyansang Makabayan ukon Bayan Aklan ro gindihon nga impeachment complaint it mga nagkaeain-eain nga organisasyon kaibahan ro pilang ka mga militante ag progresibong grupo kontra kay Vice President Sara Duterte.
Suno kay Bayan Aklan provincial coordinator Kim Sin Tugna, nagakadapat gidman nga iimpeach ro bise presidente agud nga inde eon pagpamarisan it iba pang opisyal it gobyerno.
Pila sa mga nagapangunang rason nga anang ginsaysay ro betrayal of public trust ag ro inde maipaathag nga paggastos it milyones maghalin sa kaban it bayan.
Kinamatarong eamang sigon it publiko ro andang ginaamligan rason nga kato pa man hay ginakwestyon eon nanda ro integridad it bise president bangud sa bulok kara nga pagpanerbisyo nga hayagan ro pag kaimbolbar sa corruption.
Nauna eon nga nagdihon ro pilang civil society organizations, religious leaders, sectoral representatives, ag pamilya it Tokhang victims it kauna-unahang impeachment complaint kontra kay Vice President Sara ko adlaw it Lunes.
Gindetalye sa reklamo ro ap-at nga grounds para sa impeachment nga ginakaeakipan it culpable violation of the Constitution, graft and corruption, bribery, betrayal of public trust, ag other high crimes nga gin-endorso ni Akbayan Rep. Perci Cendaña sa Office of the Secretary General it Kamara nga ginbaton mismo ni Reginald Velasco.
