KALIBO, Aklan—Kampante ro pamunuan it Bureau of Fire Protection (BFP) Aklan nga maga negatibo sanda sa coronavirus infectious disease ukon Covid-19.
Suno kay Provincial F/Marshall Supt. Nazrudyn Cablayan, negatibo ro resulta it RT-PCR test ni F/SSupt. Roderick Agoto ag limang iba pa nga andang nakasalamuha nga may direktang kontak sa 26-anyos nga fire woman rason nga kampante man sanda nga mag negatibo ro andang swab test.
Kapin sa 25 sa anang mga tawuhan ro ginboe-an it swab test nga naghalin sa fire station it Kalibo, Tangalan, Ibajay ag Malay kon sa siin presenteng naka-strict home quarantine kaibahan imaw.
Ginpahayag dugang ni Cablayan nga adlaw-adlaw ginamonitor it mga natungdan nga health authorities ro andang ikaayong eawas kon sa siin eubus man nandang ginapasaeamatan nga halin sa adlaw nga nagpatigayon sanda it quarantine hasta sa makaron hay uwa sanda it nabatyagan ukon naeksperyensyahan nga makabig nga sintomas it Covid-19.
Madumduman nga nabutang sa kontrobersiya ro BFP region VI matapos nga sambilog sa andang tawuhan hay nakasueod sa Boracay nga uwa pa natapos ro quarantine period nga ko ulihi hay ginkilaeang si Western Visayas patient 144 nga nagpositibo sa makataeapon nga virus.
