KALIBO, Aklan–Nakalista ro Bureau of Fire Proteksyon ukon BFP-Aklan it sambilog eamang nga kumpirmadong insidente it sunog sa unang napueong adlaw it Fire Prevention Month, makaron nga buean it Marso.
Raya hay ro natabo nga sunog kahapon sa Sitio Diniwid, Brgy. Balabag sa isla it Boracay kung siin sangka panimaeay nga himo sa light materials ro naugdaw.
Suno kay SFO1 Andri Von Rowan it BFP-Aklan nga kapin sa P63,000 ro gin-aywan nga danyos it sunog ag sa mayad nga swerte hay owa it nailistang nahalitan ukon nadaeahig nga iba pang panimaeay.
Sa pihak kara, padayun gihapon ro andang pagpadumdum sa mga pumueoyo nga maging vigilante ag ipabilin ro pagdahan sa tanan nga kahigayunan agud nga makalikaw sa sunog.
Importante sigon nga sikyaron ro tanan nga appliances ag bue-on sa saksakan eabi pa kun nagapanaw it maeayuan ag owa it tawo sa baeay.
Kamana man nga likawan ro pagbakae ukon paggamit it mga substandard nga electric wire bangud masami raya nga ginahalinan it sunog sa mga residential area.
