KALIBO, Aklan – – – Naka-hightened alert eon ro Bureau of Fire Protection (BFP) Kalibo para sa pagdumdom it Pista Minatay.
Suno kay Senior Fire Inspector Donie Torre, it Bureau of Fire Protection Kalibo, raya hay bilang preparasyon sa selebrasyon it pista minatay epektibo umpisa ku Oktubre 27 hasta it Nobyembre 3 it makaron nga dag-on.
Ro pila sa mga aktibidades sigon it BFP hay ro pagpatigayon it inspection sa pila ka mga matawong lugar kapareho it mga malls ag terminal agud nga masigurado ro seguridad ag kaeuwasan it tanan.
Dugang pa ni Torre, nga nagapatigayon sigon sanda it pagrekoreda adlaw-adlaw agud ipadumdom sa publiko ro pila sa mga fire safety precautions sa tagsa nanda ka mga panimaeay.
Samtang, ginpadumdom man ni Senior Fire Inspector Torre nga siguraduhon nga uwa it mga nakasaksak nga mga electrical appliances sa tagsa nanda ka-panimaeay antes aywanan kamana man nga uwa it naaywanang kaeayu ukon baga sa andang mga eaha-an agud nga masigurado nga hilway ag malikawan ro sunog.
