NUMANCIA, Aklan—Padayun pa ro ginahimo nga imbestigasyon it Bureau of Fire Protection ukon BFP-Numancia agud nga matumod ro posibleng ginhalinan it sunog sa balkonahe it sangka baeay kun sa siin nadaeahig ro 2 motorsiklo nga naka parking pasado alas-7, gabi-i it Biyernes, Nobyembre 1 sa Purok 3, Barangay Navitas, Numancia.
Suno kay FO2 Adrian Villas it BFP-Numancia nga gina-usisa pa nanda kon sa depektibong saksakan naghalin ro kaeayo nga nagpa-ugdaw sa bilog nga balkonahe ag 2 motorsiklo.
Sa initial nga assessment base sa panaysayon it nakasaksi, samtang nagatikang pauli hay nakapan uhan nanda ro nagakaeayo nga portion it baeay it andang kaeapit rason nga insigida imaw nga nagpangayo it bulig .
Mabahoe man ro pagpasaeamat it pamilya ag ko BFP sa pagbueuligan it mga pumueuyu ag pag activate it fire auxiliary group it barangay council rason nga insigidang natapna ro kaeayo ag owa eon nagkalhit sa sueod it baeay.
Ginaboeobanta nga 85,000 pesos ro danyos nga gintuga it sunog .
