KALIBO, Aklan—Pasado eon sa ikaywang pagbasa it Kamara ro proposisyon agud nga magbilog it government-owned and -controlled corporation (GOCC) nga magadumaea sa Boracay.
Raya hay sa pihak it hugut nga pagpamalibad it mga lokal nga opisyal , mga ahensiya it gobyerno ag nagkaeain-eain nga grupo sa isla.
Suno kay House Deputy Minority Leader ag Bayan Muna Rep. Carlos Zarate nga ro pagbilog it Boracay Island Development Authority (Bida) bilang corporate body hay maka-apekto sa mga maintok nga negosyante ag residente it isla.
Si Zarate hay sambilog man sa mga nagakontra sa kontrobersiyal nga hagna.
Ro House Bill No. 9826 halin sa gintingob nga kapin sa 9 nga kapaehong bills hay nagatuyo nga magtukod it Bida bilang GOCC nga may corporate powers nga magabilog it Boracay Action Plan
Sa idaeum it proposisyon, makaangkon ro Bida it gahum nga magsueod sa kontrata, magparenta, magbakae, magbaligya , mag-angkon , magpanag-iya ukon mag-dispose it real property sa anuman nga pamaagi.
Ginhambae ni Zarate nga maabu nga sector ro nagakabaeaka nga ro posibleng rason it pagpasarado sa Boracay it an-um nga buean ko 2018 nga ginasugid nga para sa rehabilitasyon apang ro matuod hay plano raya nga buksan para sa mga mabahoe nga negosyo ag foreign investors.
Ginpahayag dugang nga pagaduea-on it Bida ro kinamatarung ag mandato it lokal nga gobyerno it aklan ag banwa it Malay.
Nauna eon nga nagpamalibad kara ro sangguniang panlalawigan ag mga miyembro it sangguniang bayan it Malay ag iba pang banwa pinaagi sa pagpasa it resolutions nga naga-oponer sa GOCC nga klase it Bida.
Sa baylo ginaduso nanda ro pagbilog it multiagency regulatory body kapareho sa Boracay Inter-Agency Task Force (BIATF).
Ginaeauman nga ro Bida ro magabueos sa BIATF nga nagadumaea sa rehabilitasyon it isla umpisa ko Abril 2018.
Pila sa kontrobersiyal nga probisyon it bill hay ro pagtau it gahum sa Bida nga mag-isyu it business licenses ag building permits ag magtaeana it limit sa real property taxes nga makolekta it lokal nga gobyerno.
