NATIONAL News — Mayad nga balita sa mga motorista bangud nga may pagaeauman nga mabahoe nga bawas presyo sa mga produktong petrolyo sa masunod nga domingo kadungan it selebrasyon it Semana Santa base sa pagboeobanta it Department of Energy.
Base sa estimate it industriya it langis sa nasyon, pagaeauman ro bawas presyo nga P3.30 hasta P3.75 sa kada litro it gasolina, P2.90 hasta P3.40 sa kada litro it diesel, ag P3.40 hasta P3.50 man sa kada litro it kerosene.
Ro nasambit nga estimate hay base sa ap-at nga adlaw nga trading sa Mean of Platts Singapore (MOPS).
Ro mabahoe nga bawas presyo hay tuga it naga-grabeng tensyon sa trading sa tunga it US ag China nga nagresulta sa kahadlok sa recession ag pagnaba it demand para sa krudo.
Ro mga kumpanya it gasolina hay naga-anunsyo it andang panibag-ong presyo kada litro kada Lunes nga ginapatuman pagka-aga it Martes.
Sa unang parte it makaron nga buean it Abril, ro mga kumpanya it langis hay nagpatuman man it tig sangkiri nga pagnaba sa andang mga produkto.
