KALIBO, Aklan—Kabilugang 32 plastic sachet it ginadudahang shabu ro narekober halin sa ginakabig nga bigtime drug pusher sa ginpatigayong drug buy-bust operation it pulisya sa Sitio Lugutan, Barangay Manocmanoc, Boracay.
Ginkilaea ro suspek nga si Carlito Fernando, Jr. 31, maintenance staff it sangka water company ag tubong Looc, Romblon apang presenteng naga-istar sa nasambitang isla.
Ginkasa ro operasyon kontra sa suspek it gintingob nga pwersa it Malay PNP, 2nd Aklan Provincial Mobile Force Company ag Philipine Drug Enforcement Agency (PDEA) matapos nga makumpirmang sambilog imaw sa mga drug supplier sa isla.
Una kara, nabak-ean it limang sachet it suspected shabu si Fernando kabaylo it P5,200 it nagpakilaeang poseur buyer.
Sa ginpatigayong body search sa suspek, dugang nga 27 sachet it suspected shabu nga nagabalor it P35,000 kaibahan ro cellphone nga may sueod nga mga illegal transaction ro nabueo halin kana.
Si Fernando hay nakakulong makaron sa Malay Police Station ag nagapangatubang sa kasong pag-eabag sa Republic Act 9165 ukon Comprehensive Dangerous Drugs Act of 2002.
