KALIBO, Aklan — Arestado it mga pulis ro sangka 18 anyos nga binatilyo nga gina alegar nga nagaduso it droga sa ginpatigayon nga operasyon bandang alas-8:35, Sabado it agahon sa Barangay Poblacion, Numancia, Aklan.
Nadakpan ro suspek nga si John Moises, residente it Barangay Badio, Numancia matapos nga mabak-ean raya it ilegal nga droga sa operasyon nga ginpangunahan it Provincial Drug Enforcement Unit (PDEU)-Aklan ag Numancia Municipal Police Station sa nasambit nga lugar.
Ginasugid nga mabuhay eon nga ginpaidaeum sa surveillance ro suspek, kun sa siin, pinaagi sa online ro anang pakikipag-transaksyon.
An-um nga sachet it ginadudahan nga shabu ro nabo-oe sa suspek at kapin sa 4,000 pesos nga marked money kabaylo it ginbakae nanda nga daywang sachet it illegal nga droga.
Suno kay P/Lt. Col. Frenzy Andrade, hepe it PDEU-Aklan nga makapilang beses sanda nga naghana nga madakpan ro suspek, apang masyado raya nga madahan sa pakikipag-transaksyon.
Nakaangkon man raya it lastro sa anang eawas matapos nga nagsukoe sap ag-aresto kana.
Kasong pag-eabag sa Comprehensive Dangerous Drugs Act ro igapasaka sa nasambit nga binatilyo.
